Disa vepra që të shpiejnë në xhenet

    1. Leximi i Ajetit Kursi pas çdo namazi

    Transmetohet nga Ebu Hurejra [radijallahu anhu]  se i Dërguari i Allahut [sal-lallahu alejhi ve sel-lem] ka thënë: “Kush e lexon ajetin Kursi pas çdo namazi nuk e pengon këtë njeri për t'u futur në xhenet përveç se vdekja.”  [transmeton Nesaiu]

        2. Thënia e Shehadetit pas çdo abdesi

        Transmetohet nga Omer Ibën Hatabi [radijallahu anhu] se i Dërguari i Allahut [sal-lallahu alejhi ve sel-lem] ka thënë: “Çdonjëri prej jush, që merr abdes e më pas thotë “أشهد أن لا إله إلا الله , وأن محمدا عبده ورسوله (Esh-hedu En La ilahe il-lallah ve Enne Muhammeden Abduhu Ve Resuluhu) Dëshmoj se nuk ka të adhuruar meritor tjetër pos Allahut dhe se Muhamedi është rob dhe i dërguari i Allahut, do t’i hapen tetë dyert e xhenetit e do të futet nga cila derë dëshiron.”

        3. Të kërkuarit nga Allahu xhenetin

        Transmetohet nga Enesi [radijallahu anhu] se i Dërguari i Allahut [sal-lallahu alejhi ve sel-lem] ka thënë:“Kush kërkon nga Allahu [subhanehu ve teala]  tri herë xhenetin, xheneti do të thotë: “O Zot, fute këtë njeri në xhenet!” Ndërsa kush kërkon tri herë mbrojtje prej zjarrit të xhehenemit, xhehenemi do të thotë: “O Zoti im, largoje këtë njeri nga zjarri!”

        4. Kërkimi i diturisë

        Transmetohet nga Ebu Hurejra [radijallahu anhu] se i Dërguari i Allahut [sal-lallahu alejhi ve sel-lem] ka thënë: “Ai i cili merr rrugën për të kërkuar dituri, Allahu do t’ia lehtëson rrugën për në xhenet.”

        5. Mësimi përmendësh dhe të vepruarit me kuptimin e Emrave të Allahut

        Transmetohet nga Ebu Hurejra [radijallahu anhu] se i Dërguari i Allahut ka thënë: “Allahu [subhanehu ve teala] posedon nëntëdhjetenëntë emra.  Ai i cili i mëson përmendësh dhe vepron me kuptimin e këtyre emrave do të hyjë në xhenet.”

        6. Falja e namazit të natës

        Transmetohet nga Abdullah ibën Selami [radijallahu anhu] se i Dërguari i Allahut [sal-lallahu alejhi ve sel-lem] ka thënë: “Përhapeni selamin, shpërndani ushqim, vizitoni farefisin dhe faluni gjatë natës kur njerëzit janë në gjumë do të futeni në xhenet me siguri dhe paqe.”

        7. Ndërtimi i xhamiave

        Transmetohet nga Othmani [radijallahu anhu] se e ka dëgjuar të Dërguarin e Allahut [sal-lallahu alejhi ve sel-lem] duke thënë: “Kush e ndërton një xhami për hir të Allahut, Allahu [subhanehu ve teala] do t’ia ndërtojë një shtëpi në xhenet.”

        8. Haxhi i pranuar

        Transmetohet nga Ebu Hurejra [radijallahu anhu]  se i Dërguari i Allahut [sal-lallahu alejhi ve sel-lem] ka thënë: “Umreja deri në umre i shlyen mëkatet, ndërsa nuk ka shpërblim tjetër për Haxhin e pranuar vetëm se xheneti.”

        9. Largimi i një pengese nga rruga

        Transmetohet nga Ebu Hurejra [radijallahu anhu] se i Dërguari i Allahut [sal-lallahu alejhi ve sel-lem] ka thënë: “E kam parë një njeri duke u shëtitur në luginat e xhenetit, që shkak për hyrjen e tij në xhennet ishte një pemë që e kishte prerë ngase iu pengonte myslimaneve.”

        10. Falja e namazit

        Transmetohet nga Ebu Musa el-Eshari [radijallahu anhu] se i Dërguari i Allahut [sal-lallahu alejhi ve sel-lem] ka thënë: “Kush e falë namazin e sabahut dhe ikindis do të  hyjë në xhenet.”